July 25, 2021

ಉತ್ತರಪ್ರದೇಶ, ಅಸ್ಸಾಂನಲ್ಲಿ ನೂತನ ಜನಸಂಖ್ಯಾ ನೀತಿಗೆ ಚಿಂತನೆ; ಮೂರು ಮಕ್ಕಳಿದ್ದರೆ ಸರಕಾರಿ ಸೌಲಭ್ಯ ಕಟ್.!

ಲಖನೌ:- ದೇಶಾದ್ಯಂತ ‘ಸಮಾನ ನಾಗರಿಕ ಸಂಹಿತೆ’ ಜಾರಿ ಬಗ್ಗೆ ಗಂಭೀರ ಚರ್ಚೆಯ ನಡುವೆಯೇ, ಉತ್ತರ ಪ್ರದೇಶ ಮತ್ತು ಅಸ್ಸಾಂ ಸರಕಾರಗಳು ಕಠಿಣ ಜನಸಂಖ್ಯಾ ನಿಯಂತ್ರಣ ನೀತಿ ಜಾರಿಗೆ ಮುಂದಾಗುವ ಮೂಲಕ ಗಮನ ಸೆಳೆದಿವೆ. ಎರಡಕ್ಕಿಂತ ಹೆಚ್ಚು ಮಕ್ಕಳನ್ನು ಹೊಂದಿರು ವವರನ್ನು ಸರಕಾರಿ ಸೌಲಭ್ಯ ಮತ್ತು ಸರಕಾರಿ ಉದ್ಯೋಗಕ್ಕೆ ಅನರ್ಹಗೊಳಿಸುವುದು, ಅಂತಹವರಿಗೆ ಚುನಾವಣಾ ಸ್ಪರ್ಧೆ ನಿಷೇಧವು ಸೇರಿದಂತೆ ಹಲವು ಕಠಿಣ ನಿರ್ಬಂಧಗಳನ್ನು ಒಳಗೊಂಡ ಜನಸಂಖ್ಯಾ ನಿಯಂತ್ರಣ ಕಾಯಿದೆಯ ಕರಡನ್ನು ಉತ್ತರ ಪ್ರದೇಶದ ಕಾನೂನು ಆಯೋಗ ಸಿದ್ಧಪಡಿಸಿದೆ.

‘ಉತ್ತರ ಪ್ರದೇಶ ಜನಸಂಖ್ಯೆ (ನಿಯಂತ್ರಣ, ಸ್ಥಿರೀಕರಣ ಮತ್ತು ಕಲ್ಯಾಣ) ಕಾಯಿದೆ 2021’ ಎಂದು ಕರೆಯಲಾಗುವ ಈ ನೂತನ ಜನಸಂಖ್ಯಾ ನೀತಿಯ ಬಗ್ಗೆ ಸಾರ್ವಜನಿಕರಿಂದ ಸಲಹೆ-ಸೂಚನೆ ಆಹ್ವಾನಿಸಲಾಗಿದ್ದು, ಸದ್ಯದಲ್ಲೇ ಸುಗ್ರೀವಾಜ್ಞೆ ಅಥವಾ ಕಾಯಿದೆ ರೂಪದಲ್ಲಿ ರಾಜ್ಯಾದ್ಯಂತ ಜಾರಿಗೊಳಿಸುವ ಸಾಧ್ಯತೆಗಳು ಇವೆ.

ವಿಶ್ವ ಜನಸಂಖ್ಯಾ ದಿನದ ಅಂಗವಾಗಿ ಭಾನುವಾರ (ಜು.11) ಉ.ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ‘ಜನಸಂಖ್ಯಾ ನೀತಿ, 2021-30’ ಅನ್ನು ಬಿಡುಗಡೆ ಮಾಡಲಿದ್ದಾರೆ. ಉದ್ದೇಶಿತ ಜನಸಂಖ್ಯಾ ಕಾಯಿದೆಯು ಈ ನೀತಿಯ ಭಾಗವೇ ಆಗಿರಲಿದೆ.

ಬದಲಾಗುತ್ತಿರುವ ಸಾಮಾಜಿಕ ಪರಿಸ್ಥಿತಿ ಹಿನ್ನೆಲೆಯಲ್ಲಿ ‘ಸಮಾನ ನಾಗರಿಕ ಸಂಹಿತೆ ಜಾರಿಯ ಅವಶ್ಯಕತೆ ಇದ್ದು, ಇದರ ಜಾರಿಗೆ ಕ್ರಮ ಕೈಗೊಳ್ಳಬೇಕು ಎಂದು ದಿಲ್ಲಿ ಹೈಕೋರ್ಟ್ ಶುಕ್ರವಾರ ಕೇಂದ್ರ ಸರಕಾರಕ್ಕೆ ಸೂಚಿಸಿದ್ದು, ಇದರ ನಡುವೆಯೇ ಉತ್ತರ ಪ್ರದೇಶ ಸರಕಾರದ ಕ್ರಮವು ಗಮನ ಸೆಳೆದಿದೆ.

ಯುಪಿ ಹಾದಿಯಲ್ಲಿ ಅಸ್ಸಾಂ.:

ಅಸ್ಸಾಂನ ಬಿಜೆಪಿ ಸರಕಾರ ಸಹ ಇದೆ ಹಾದಿ ತುಳಿಯಲು ಮುಂದಾಗಿದೆ. ಅಸ್ಸಾಂ ಸರಕಾರವೂ ಎರಡು ಮಕ್ಕಳ ನೀತಿ ಯನ್ನು ಜಾರಿಗೊಳಿಸಲು ಸಿದ್ಧತೆ ನಡೆಸಿದೆ. ಜು.12ರಿಂದ ಆರಂಭವಾಗಲಿರುವ ವಿಧಾನಸಭೆ ಅಧಿವೇಶನದಲ್ಲಿ ಈ ಕುರಿತ ವಿಧೇಯಕ ಮಂಡಿಸಲು ಸಿಎಂ ಹಿಮಂತ ಬಿಸ್ವಾ ಶರ್ಮ ಸರಕಾರ ನಿರ್ಧರಿಸಿದೆ. ಈ ನಿಯಮ ಪಾಲಿಸುವವರಿಗೆ ಸಾಲ ಮನ್ನಾ ಸೌಲಭ್ಯವನ್ನೂ ವಿಸ್ತರಿಸಲು ಅಸ್ಸಾಂ ಸರಕಾರ ಮುಂದಾಗಿದೆ.

2017ರಲ್ಲೇ ರಾಜ್ಯದಲ್ಲಿ ಸರಕಾರಿ ನೌಕರರಿಗೆ 2 ಮಕ್ಕಳ ನಿಯಮವನ್ನು ಜಾರಿಗೊಳಿಸಲಾಗಿದ್ದರೂ, ಅದನ್ನು ಇಡೀ ರಾಜ್ಯದ ಜನತೆಗೆ ವಿಸ್ತರಿಸಲು ಮುಂದಾಗಿದೆ. ಈಗಾಗಲೇ ರಾಜ್ಯದ ಮುಸ್ಲಿಂ ಸಮುದಾಯದ ಜತೆ ಸಿಎಂ ಹಿಮಂತ ಬಿಸ್ವಾ ಶರ್ಮ ಈ ಕುರಿತು ಸಮಾಲೋಚನೆ ನಡೆಸಿದ್ದು, ಅವರ ಮನವೊಲಿಕೆಗೆ ಪ್ರಯತ್ನಿಸಿದ್ದಾರೆ. ಎಸ್ಸಿ/ಎಸ್ಟಿ ಮತ್ತು ಚಹಾ ತೋಟದ ಕಾರ್ಮಿಕರನ್ನು ಜನಸಂಖ್ಯಾ ನೀತಿಯಿಂದ ಹೊರಗಿಡಲು ಅಸ್ಸಾಂ ಸರಕಾರ ನಿರ್ಧರಿಸಿದೆ.

ಬಹುಪತ್ನಿತ್ವದ ವಿಚಾರ :

ಯಾವುದೇ ಧಾರ್ಮಿಕ ನೀತಿಯಲ್ಲಿ ಬಹು ಪತ್ನಿತಕ್ಕೆ ಅವಕಾಶವಿದ್ದು ಒಬ್ಬ ವ್ಯಕ್ತಿ ಹಲವು ಮಹಿಳೆಯರನ್ನು ವಿವಾಹವಾಗಿದ್ದರೆ, ಎಲ್ಲಾ ಪತ್ನಿಯರ ಜತೆಗಿನ ಒಟ್ಟಾರೆ ಮಕ್ಕಳನ್ನು ಪರಿಗಣಿಸಲಾಗುವುದು. ಒಬ್ಬ ಮಹಿಳೆಯು ಹಲವು ಪುರುಷರನ್ನು ವಿವಾಹವಾಗಿದ್ದರೂ ಇದೇ ನಿಯಮ ಅನ್ವಯ.

ಪ್ರಯೋಜನಗಳೇನು.?

ರಾಜ್ಯದಲ್ಲಿ ಪರಿಸರ ಮತ್ತು ಆರ್ಥಿಕ ಸಂಪನ್ಮೂಲಗಳು ಸೀಮಿತವಾಗಿರುವ ಕಾರಣ ಜನಸಂಖ್ಯೆ ಹೆಚ್ಚುತ್ತಾ ಹೋದರೆ ಊಟ, ವಸತಿ, ಶುದ್ಧನೀರು, ಗುಣಮಟ್ಟದ ಶಿಕ್ಷಣ, ವಿದ್ಯುತ್, ಉದ್ಯೋಗ, ಭದ್ರತೆ
ಇತ್ಯಾದಿ ಸೌಲಭ್ಯಗಳನ್ನು ಎಲ್ಲಾ ನಾಗರಿಕರಿಗೂ ಒದಗಿಸಲು ಕಷ್ಟವಾಗುತ್ತದೆ.ಹೀಗಾಗಿ ಸಂಪನ್ಮೂಲಗಳ ಸಮಾನ ಹಂಚಿಕೆ ಹಾಗೂ ಸುಸ್ಥಿರ ಅಭಿವೃದ್ಧಿಗಾಗಿ ಜನಸಂಖ್ಯೆಯ ನಿಯಂತ್ರಣ, ಸ್ಥಿರೀಕರಣ ಅತ್ಯಗತ್ಯ ಎಂದು ಕರಡಿನಲ್ಲಿ ಹೇಳಲಾಗಿದೆ.

ಎರಡಕ್ಕಿಂತ ಹೆಚ್ಚು ಮಕ್ಕಳಿದ್ದರೆ…

# ಪಡಿತರ ಸೇರಿ ಸರಕಾರದ ಎಲ್ಲಾ ಸಬ್ಸಿಡಿ ಕಟ್

# ಸರಕಾರಿ ಉದ್ಯೋಗಕ್ಕೆ ಅನರ್ಹ

# ಸರಕಾರಿ ನೌಕರರಾಗಿದ್ದರೆ, ಬಡ್ತಿಗೆ ಅನರ್ಹ

# ಸ್ಥಳೀಯ ಸಂಸ್ಥೆ ಚುನಾವಣೆ ಸ್ಪರ್ಧೆಗೆ ನಿಷೇಧ

ಒಂದು, ಎರಡು ಮಕ್ಕಳಿದ್ದರೆ…

# ನೌಕರರಿಗೆ ಸೇವಾವಧಿಯಲ್ಲಿ 2 ಹೆಚ್ಚುವರಿ ಇನ್‌ಕ್ರಿಮೆಂಟ್

# 12 ತಿಂಗಳು ಪೂರ್ಣ ಸಂಬಳ ಸಹಿತ ಮಾತೃತ್ವ/ಪಿತೃತ್ವ ರಜೆ

#ಪಿಂಚಣಿ ಯೋಜನೆಗೆ ಸರಕಾರದಿಂದ
3% ಹೆಚ್ಚುವರಿ ಕೊಡುಗೆ

#ರಿಯಾಯಿತಿ ದರದಲ್ಲಿ ಮನೆ, ನಿವೇಶನ ಖರೀದಿಗೆ ಅವಕಾಶ

#ವಿದ್ಯುತ್, ನೀರು ಬಿಲ್‌ಗಳಲ್ಲಿ ರಿಯಾಯಿತಿ

ಒಂದೇ ಮಗು ಇದ್ದರೆ..

#ಐಐಎಂನಂತಹ ಪ್ರತಿಷ್ಠಿತ ಶಿಕ್ಷಣ ಸಂಸ್ಥೆಗಳಲ್ಲಿ ಪ್ರವೇಶಕ್ಕೆ ಆದ್ಯತೆ

#ತಂದೆ-ತಾಯಿಗೆ ಒಂದೇ ಸಂತಾನವಾಗಿದ್ದರೆ ಸರಕಾರಿ ಉದ್ಯೋಗದಲ್ಲೂ ಆದ್ಯತೆ

#ಒಂದೇ ಮಗು ಇದ್ದರೆ 20 ವರ್ಷದವರೆಗೂ
ಉಚಿತ ಆರೋಗ್ಯ ಮತ್ತು ವಿಮಾ ಸೌಲಭ್ಯ ಒಂದೇ ಹೆಣ್ಣು ಮಗು ಇದ್ದರೆ, ಉಚಿತ ಶಿಕ್ಷಣ,ಉನ್ನತ ಶಿಕ್ಷಣ, ವಿಶೇಷ ವಿದ್ಯಾರ್ಥಿ ವೇತನ ಸಿಗಲಿದೆ.

_________

Share this News
error: Content is protected !!